حلَّ الفنان مصطفى كامل، نقيب المهن الموسيقية، ضيفاً على برنامج “كشف حساب”، الذي تقدّمه المذيعة إنجي هشام على قناة “هي”.
تحدث عن تقصير نقابة المهن الموسيقية في حق الفنانة شيرين عبد الوهاب وعدم مساندتها، وتدخل المهن التمثيلية لمساعدتها، قال نقيب الموسيقيين: “ليس كل ما يُعرف يقال، اللي الناس متعرفهوش إن دي حالة تخص شخص معيّن غير قابلة للتدخل غير من نفسه ومن أهليته، لما أكون غير قادر على علاجه بناشد الدولة، دي حالتها خاصة المفروض محتاجة دعم معنوي، وتواصلت مع حد مقرب منها وجنبها في الفترة دي لما اتقال تعبانة، قالت لي الحالة مش حلوة وتعبانة وبنعالجها، قالت نفسيتها مش تمام ومش هتقبل تشوف حد وادعيلها”.
وكشف مصطفى كامل عن تفاصيل مشكلته مع الفنانة اللبنانية هيفاء وهبي، وسبب عدم اعتذارها لنقابة المهن الموسيقية حتى الآن، خاصة بعد توجيه أكثر من إنذار وإخطار لها على خلفية الإساءة الى مدير أعمالها المصري وعضو النقابة، مما أدى الى صدور قرار بإيقافها عن العمل داخل مصر.
وقال مصطفى كامل: “أنا معنديش حسابات تحت الترابيزة، ليا زميل عضو جمعيه عمومية هو مدير أعمالها، أشتكى إنها كتبت كلام وحش عنه، أنا بعتت إنذارات وطلب حضور، لإني مبحبش الشطب والمنع بحس إني قاتل، ولكن في ناس عملنا معاهم ده لأنهم يستحقوا، وزميلي ده له حق عليَّ، وابتديت أكلّم المستشار القانوني ياسر قنطوش محاميها، الموضوع سهل، صالحي الراجل وراضيه”.
وأضاف: “دوري أحمي حقه، ولما مجتش هيفاء واعتذرت، خدنا القرار، ومبعرفش آكل حرام ولا ليَّ في القذارة بخاف على سمعتي، كلمتني عن طريق شخص صاحبي وأخويا وطلبت تكلّمني، قولت لها يا هيفاء أنت أخطأت في حقه وكان أقربلك مني، لما أبعتلك أقولك تعالي إتراضي بعد ما أسأت ليه فأنت مجتيش، قالت لي لو ينفع أجيلك البيت… في الوضع ده أنا أتحط في مكان مش كويس الأزمة تخلص مع زميلي في النقابة وبيتي مفتوح لك”.
