وجه الفنان تامر حسني رسالة مؤثرة إلى المخرج محمد سامي، عقب إعلان الأخير اعتزال الإخراج التلفزيوني، مؤكدًا على نجاحاته الكبيرة في الدراما التلفزيونية، وذلك عبر تعليق كتبه على منشور سامي على “فيسبوك”.
كتب تامر حسني في تعليقه: اوعى تكون عايز تبعد عشان أي إحباط، جايز يكون فعلًا في بعض المشاهد اللي الناس انتقدتها وأنا شخصيًا استغربتها شوية، وقلت جوايا إنك مش محتاج تعملها أصلًا؛ لأن عندك الحقيقي والأهم، بس على رأيك الفنون جنون، أحيانًا فكرة مجنونة تنال الإعجاب، وفكرة لا.. بس ده ميخليناش ننسى إنها بعض مشاهد مش بعض أعمال؛ لأنك بالفعل المخرج الوحيد في تاريخ مصر اللي مفشلش ولا مرة، ويمكن الحظ محالفكش أوي في عمل ولا 2 على مدار 14 سنة، ودي حاجة مينفعش الجمهور ينساهالك.
وتابع بالقول: أنت قدمت مسلسل آدم اللي جمع كل المصريين وكل الوطن العربي يتفرجوا عليه زي ماتشات الكورة، بسبب إنه اتكلم عن قضية تخص كل الوطن، وكان بداية لصورة جديدة أول مرة كانت بتتقدم في مصر، وبعدها سبق الإصرار وحكاية حياة اللي كانوا نقلة كبيرة في ديكورات الدراما المصرية، وبعدين الأسطورة والبرنس وجعفر العمدة اللي حققوا نجاحات ساحقة، وكانوا أعلى نسبة مشاهدات في الدراما بشكل عام، وبعدهم نعمة الأڤوكاتو وإش إش وسيد الناس، اللي برضو كل واحد فيهم يا أعلى مشاهدة يا تاني أعلى مشاهدة.
واستأنف: هزعل منك لو هتمشي محبط وأنت أنجح حد، الشجرة الخضراء الجميلة ساعات بيطلع لها ورق أصفر بسيط، عادي بيتقص وبتفضل شجرة كبيرة وجميلة، وده التطوير الطبيعي للإنسان الناجح اللي بيطور نفسه وعنده شخصية، بدليل أن مسلسلاتك بيتقال عليها مسلسلات محمد سامي، وتركيز الناس معاك دليل على حبهم لأعمالك، ورغم أن بعضهم بينتقدوها بس متابعينها حرف حرف، ونقدهم ليك بيبقى على قد حجمك، وهي دي ضريبة الناجحين الكبار.
وأضاف: سافر وكمل حلمك وأنت منتصر بتاريخك، وأوعى تُحبط، وأنا عارف إن محمد سامي اللي اكتشفته أنا وقدمته للصناعة وهو عنده 27 سنة لا يمكن هيتهز، ممكن يزعل يومين ويراجع نفسه في مشاهد أنا مبسوط منك إنك بمنتهى الشجاعة الأدبية اعتذرت على تقديمها، خد راحة شوية وارجع أقوى من الأول، وأنا واثق من اللي هتسافر عشانه إنه قرار هيضيف نقلة كبيرة لمشوارك.
واختتم بتوجيه نصيحة لصديقه: أوعى تخلي الزعل من بعض المشاهد ينسيك أنت قدمت إيه للدراما، ياريت قبل ما نقسى على سامي بالطريقة دي نفتكر هو أمتعنا سنين قد إيه بمسلسلاته، وأنا ذكرتها كلها عشان لو حد ناسي أفكره، وعشان لو هو محبط يجمد تاني، ربنا ينور طريقك وترجع أقوى وأقوى من أي وقت، واثق فيك يا حبيبي، وأنا هفضل أخوك الكبير وفي ضهرك إن شاء الله طول العمر يا بطل.”
